اختاري شنطتك.. وداري عيوب جسمك!!

طبعاً أي بنت هتشوف العنوان ده "اختاري شنطتك.. وداري عيوب جسمك" هتسأل نفسها معقول إن الشنطة ممكن إنها تساعدني فعلاً إني أداري عيوب جسمي؟!

هاقول لك: آه فعلا.. بس بشرط إنك تعرفي إزاي تختاري الشنطة المناسبة ليكِ.. يعني مثلاً..

1- لو كنتِ مليانة سواء من منطقة الذراعين أو منطقة الصدر، يبقى أنسب حاجة ليكِ هي الشنطة الطويلة؛ لأن الشنطة القصيرة هتبرز امتلاء منطقة الصدر ومش مناسبة نهائيا للذراع المليان.

2- لو كنتِ مليانة من منطقة الوسط يبقى أحسن حاجة إنك تختاري شنطة كبيرة وذات يد قصيرة، علشان تبعدي الانتباه عن امتلاء منطقة الوسط نهائي.

3- لو كنتِ رفيعة وطويلة يبقى أحسن حاجة ليكِ هي الشنطة الكبيرة الضخمة نوعاً ما.

4- لو كنتِ رفيعة وقصيرة يبقى تجنبي الشنط الكبيرة أوي؛ لأنها هتديكِ شكل طفولي وغير متناسق، والأفضل ليكِ هي الشنط الصغيرة أو متوسطة الحجم.

5- لو كنتِ مليانة وطويلة يبقى ابعدي خالص عن الشنطة الكبيرة واختاريها متوسطة الحجم أو صغيرة.

شنط آخر موضة
ودلوقتي بقى تعالي نتعرّف مع بعض على أحدث موضة في الشنط لعام 2010:

• بالنسبة لتصميم الشنط هتلاقي إن الموضة هي الشنط اللي إيديها صغيرة، لدرجة إنك ممكن تمسكيها في إيديكِ، وما تحطيهاش على كتفك.

• كمان الشنط المشجرة بألوان مختلفة من الحاجات الجديدة السنة دي سواء في الصيف أو الشتاء 2010.

• واوعي تنسي إنك تشتري شنطة سوداء وشنطة بني؛ لأنك هتلاقيهم مناسبين مع معظم اللبس اللي عندك خلال الشتاء.

• وبالنسبة للألوان الموضة السنة دي في الشنط؛ فهي: الأسود، والبني، والبيج، والأبيض، والنبيتي، والموف الغامق، والأزرق الصريح، واللبني.

وفي النهاية أحب أقول لك نصيحة تاخدي بالك منها، وهي إنك وإنتِ بتشتري ممكن تختاري شنطة واحدة أو اتنين على الموضة، والباقي تجيبيهم عاديين علشان ما تضطريش إنك ترمي الشنط اللي جبتيها بعد موضتها ما تخلص، وخدي بالك إن لون الشنطة يكون مناسب إلى لون ملابسك وإلى لون حذائك كمان.

ودلوقتي تعالي نتفرّج على جاليري لأحدث موديلات الشنط

اختاري شنطتك.. وداري عيوب جسمك!! Main